E cusì andando un dì torzedi, sì li aparse dananti in mar una gran bestia molto strania da veder e de boca li insiva una gran splumada, e perché ela coreva forte, l'aqua feva gran movimento; e pareva ch'ela vegnise viazamente driedo eli per devorarli. E como eli ave vezudo questa bestia cusì bruta e cusì granda, la qual li vegniva driedo cusì tosto con la boca averta, mostrando ch'ela li volese devorar, eli ave molta gran paura e comenzà forte a cridar e dise: "O Dio, nui ve pregemo che vui ne aidé e liberéne da questa bestia cusì prava, ch'ela no 'nde posa devorar". E san Brandan li confortà e dise cusì: "Omeni de poca fe', non abié paura. Dio, lo qual è nostro aidador, sì ne canperà ben da questa bestia e anche da li altri pericoli".
      Ela sì li avisinava e le onde se levava molto grande intorno li frari e stava in la nave malamente e li frari pur cridava e aveva gran paura; e lo abado vegando questo fato se mese devotamente inn-orazion e dise: "Misier Iesù Cristo, lo qual non solé abandonar li vostri amisi, s'ili retorni a vui con ferma fe', io ve priego umelemente che vui dobié scanpar li vostri servi de questa nave, sì como vui scanpase Anoè da lo diluvio de l'aqua e Davit de le man de Golias giganto e Ionas de lo ventre de lo pesie, Daniel da li lioni e Iosepo da li fradeli e Moise de le man de Faraon".
      E como elo ave questo dito, de presente parete vegnir una altra granda bestia da ozidente e andàli ben da pruovo de la nave, mo no la tocà, e andà incontra la prima bestia e arsaìla molto ardidamente e fese con esa una gran bataglia e asè dura.