E perch'elo zonse a lo Inferno e lo Inferno mostrà segno d'alegreza, onde lo fuogo fo mazor e insìne cotal flama e fumo e puza; e così fase ogna fiada, quando elo 'nde azonze le aneme de li pecatori e lo dragon le devora. Or ve ò dito com'io ston e per che casion e' die 'nde star fin lo dì del Zudisio e como io son malamente cruziado in lo profondo de l'Inferno con lo re Rodes e Pilato, Ana, Caifas, li qual patizià con mi e feme far lo pagamento per lo tradimento ch'io fisi de lo corpo de Cristo nostro signor. E perch'io sè che vui se' amigo de Dio, sì ve sconzuro per la so parte, lo qual è signor de onor e rendetor de lo mondo, che digné lu' pregar per mi a ziò ch'io sia lasado qua infina doman, che li demonii non me posa far mal nì menar via a quela ria ereditade, la qual io conpriè per mal priesio".
      E san Brandan li respose così: "De questo che tu me priegi sia 'nde quelo che Dio vol, e in questa note che mo' vien tu non sentirà alguna altra pena defina doman, levando lo sol". Puo' lo domandà ancora san Brandan (e) dise: "Dime ch'è ziò che tu sta' su questa piera e che te val questo drapo che tu à' dananti. E perché ela à queste do forzele de fero". Elo respose in questo muodo: "Io ston su questa piera, ela me zuova mo' e fo una piera ch'io misi in una fosa, ch' (i) iera fango inn-una via, per poder meter li piè suso queli che pasava de là; e questo fo avanti ch'io fose apostolo de Dio. Questo drapo ch'è qua e stame tanto lutan si è perché io ne diè uno cotal a uno puovero levroso, quando io iera camerlengo de lo Signor, e perziò elo no iera mio, mo s'ieralo de lo Signor e de li suo' apostoli e perziò lo vego lutan; mo' no me zuova, anzi me nuose tal fiada.