Le forzele de fero che vui vedé che sé a pè de questo drapo si è quele che diè a li prèvedi del tenplo de Salamon per tegnir li suo' segli".
      E como elo ave cusì dito e l'ora de la sera si vene, e parete pervegnir una onbra che scorì questo omo e la piera; e in piziola ora azonse una gran conpagna de demonii li qual iera senza numero, e tuti quanti fo intorno questo Iuda e sonava forte cridar e dir in soa lementazion: "O servo de Dio, pàrtite tosto da nui, da questo luogo che tu 'de sta'; e per toa casion nu' non podemo avisinar a questo nostro conpagnon lo qual si è su questa piera, nì no 'nde poremo andar se tu non ti parti via; e nu' non seremo ardidi de andar ananti la faza de lo nostro signor Luzifero, se nu' non li apresentemo lo amigo so Iuda, lo qual tradì lo signor de li signori. In veritade tu ne à' tolto la baldeza de farli la presia e de darli la morsegada che nu' semo usadi e solemoli far; mo non lo voler aidar questa note, perch'elo te diebia pregar". Ed elo li respose lo abado in questo muodo: "Io non lo defendo, mo lo signor Dio abia consentido ch'elo abia grazia questa note e sia defeso da vui senza altre pene che vui li voié far". Ed eli li respose così li demonii: "Como lo puos-to voler aidar nì per lo nome de Dio cansarlo, sapiando ch'elo fo traditor de lo Signor?". Elo li dise così: "Io ve comando in lo nome de lo Signor Iesù Cristo che vui non li debié far algun mal questa note." Eli li respose così li demonii: "Como clames-tu lo nome del Signor in so servisio, sapiando ch'elo lo tradì e per quela casion è dapuò contanti mali deventadi?