E voi Dio ch'elo sia tuto quelo che tu vos?". E lo abado li dise: "Io son servo de lo Signor in tute cose e tute le mie parole perché vui me debié obedir, ma Dio si è solo Signor, per la volontade de lo qual se dise e se fase quelo che ben si vol; e per la vertude de le so parole ch'è sante vui le dové obedir e no mi, e tuto quelo ch'io comando in lo so nome, elo è per lo so comandamento e per lo so consentimento ch'io abia de questo balia".
      E così parlando e ranpugnando eli (li) andà driedo defin ch'eli fo sì lonzi ch'eli non li pote più veder Iuda, e puo' li demonii tornà indriedo a tuor Iuda via de su la piera, e abiandolo in balia, eli lo portava con gran romor a lo Inferno.
      E san Brandan navegà con li suo' frari inver mezodì, loldando Dio devotamente.
     
     
     
      [28]
     
      HIC INVENERUNT (SPELUNCAM) SANCTI PAULI IN INSULA PARVA
     
      Et in lo terzo dì navegando, elo li aparse una isola piziola inver mezodì e ierali da lutan; e sì tosto como li frari l'ave vezuda, eli comenzà forte a navegar verso de quela. E como eli aprosimà a la isola, san Brandan li dise così: "O frari mie', non ve voié così forte fadigar nì le vostre menbre stancar, perché asè se' fadigadi da che nui fosemo fuora del nostro monestier. Io ve fazo asaver ch'elo è mo' sete ani conplidi a questa Pasqua, che mo' vien, che nu' se partisemo fuora de lo monestier per casion de andar in tera de veritade e de promision de li santi; tosto nu' vegniremo a conplimento de l'intendimento nostro e puo' torneremo a casa sani e salvi. Ancora troverì e vederì san Polo eremita, servo de Dio et omo de penetenzia spiritual; e si è in questa isola stado ben LXX ani per far penetenzia e no à manzado alguna cosa de zibo za se fase XL ani, nì abudo alguna vestimenta indoso.