CONTESSA. Oh! ma, cara maman, a venta propi ch'i la cria. Abate.... general.... ch'am agiutou....
      MARCHESA. Ma, mia cara fia, voeustu nen ch'i vada al triduo për coula povra Mountanera?... E coum'ela staseira?... I avia dit al caroussé ch'andeissa a piene d'noeuve.... Edouard, souna un po' 'l ciouchin! (dirindindin. Capita Alban).
      MARCHESA. Giouan elo tournà?
      ALBANO. No sgnoura. (parte)
      MARCHESA. Che minoeui ch' l'è pœui mai coul Giouan? Dunque na sastu qualcosa ti, Gina?
      CONTESSA. A m'an dime ch'a l'è sempre parei. Jer Alcoun a l'an faie fé l'oundecima sagnia; a dviou ciamé Tarela an counsult. I lou seu da la Zei, ch'a j'a passà la nœuit.
      MARCHESA. Padre Mellini ch'a l'è so counfessour am'na parlava jer, e am smiava ch'a mastieissa.
      GENERALE. Ma a l'è d' co'na benedeta foumna faita a so mœud. Tute le matin, ch'a pieuva, ch'a fioca, chila a bsogna ch'a sia a Santa Teresa a la mëssa d' set oure.... e.... ouei!... Gabriela a l'a già i so giobia d' co chila (entra Giovanni).
      GIOVANNI. I soun stait da soura countëssa d' Mountanera....tanti coumpliment e ringrassiament: a dis cousi che stasera 'l medic a l'a trouvala moutoubin mei (in coro, parole e segni di soddisfazione); e j'ai sentí ch'ai disiou al doumestic ch'andeissa a dí a soura marchesa Zei ch'a fasia pi nen dabsogn ch'a vneissa a viéla.
      MARCHESA. Oh! là! da part di Dio! Nosgnour fassa ch'as'na gava.
      CONTESSA. A l'an d'co faje 'na bela assistenssa.... coula brava Coustanssa (marchesa d'Azeglio); a la chitava mai!
      GENERALE. Ah! l'è 'n angel!
      ABATE. Brava, propi 'na brava foumna!
      GENERALE. A proposit d' la Zei.... seve lò ch'a l'an dime? Ch'l'ultim, Massimo, a chita 'l servissi.
      MARCHESA. L'ultim?... a dëv aveie vint o vintün an.... E perché?... Elou malavi?