Visum est pene ante oculos (et ridemus antiquitatem, portentosis opinionibus refertissimam), menstruis spatiis vagari, cornu aspero et inaequali, obscuris maculis tamquam fluctibus undulatum, curvatis hemicyclis identidem conspersum, splendidis globulis quasi gemmis distinctum, sparsim regesta luce oppacatum, angulis tanquam incisum, eminens, lacunosum, lunare corpus. Volui uno lacteo circulo minusculos orbes strictimque conglobatas formas lactentium stellarum crescere Pleiadum choros, iniectoque noctis terrore manere in mundi vigilia ignotum ante populum internitentium astrorum; aemulam lunae, mutuari a sole faces, inductisque in arctum cornibus, Venerem, prodire communicato commercio crescentis lucis ac senescentis; Saturnum triplici sydere coronari; Iovem, omnium fortunatissimum, Mediceorum Planetarum comitatu, disparibus motionibus antecedentium, subsequentium, abeuntium, insistentium, tutum elatumque procedere. O posteris invidam vetustatem, quae fabulosa monstrorum prodigia toto consperso caelo syderibus obstruseras, stellarumque lucentes domos inanibus belluis oneraveras, num te futuram nostris ingeniis industriam putasti, neque homines fuisse facturos, ut excellentissimis altissimisque animis atque heroicae virtuti novae syderum faces elucerent; quique, gentibus fructuosi, ad servandum humanum genus opes suas viresque contulissent, illos non usque co moraretur, dum
     
      brachia contrahit ardensScorpius, aut iusta caeli plus parte relinquit,
     
      (quod ante nostram aetatem promittere solebant), sed in recenti frequentissimoque stellarum concilio statim, sapientum beneficia referentium suffragio, collocarentur?