Sunt nostratium aliqui (uti audio), qui ad quinque millia multiplicant: oculatus testis non sum, neque facile credo; utcunque ex ipso fonte, quam ex stagnis vel vadis, istas haurire aquas cupio potius. Quapropter si a Dominatione vestra impetrare possim, ut (per hunc tabellarium) aut mihi secretum fabricandi ista organa, pellucida simulque ad libitum multiplicantia, placueris impertiri, aut saltem abiicienda aliqua tua perspicilla (sine tubo) vitrea digneris mihi communicare, quorum auxilio possim et Veneris et Saturni caelum adire, fidem tibi presto (viri tuae gratiae studiosissimi), me tuae aeternae gloriae et humanitatis plus quam solitae perpetuam fore tubam fidelissimam.
      Excellentissimum tuum instrumentum, quod Berneggerus merito compendium universae geometriae nuncupavit(1506), pre manibus habemus. Sistema mundi, a tuo Sidereo Nuncio promissum(1507), valde cupimus; et singulis nundinis aliquid tuo tanto ingenio dignum avide expectamus. Pluribus te non gravabo: hoc unicum obnixe rogo, ut si quid in hac charta quod scholasticum minus sapit (qualem me non profiteor) inveneris, illud simul, et hanc temerariam nimis et audacem scriptiunculam, in meliorem partem interpreteris.
      (Verte(1508).)
      Bene vale, vir Excellentissime, cui omnia fausta et felicia intime precor, et me tibi tuoque nomini, pro admirando tuo singularis ingenii acumine, semper addictissimum fore scias.
     
      Excellentissimae tuae Dominationi
     
      AddictissimusIohannes Welseus, Londinensis.
     
      Londino Angliae, Octobris quinto iuxta stylum veterem, anno Do. 1613.