77, min. 30, unde elicere est aequaleis apparuisse luminarium diametros.
      Iam si istheic observata eclipsis haec fuerit, habebimus saltem parallaxeos [vedi figura luna3.gif] pro varietate latitudinis locorum differentiam. Et cum latitudo Aquensis observata sit 43 grad., 33 min., ex discrimine istius cum vestra, ac differentia parallaxeos, colligemus quae fuerit tunc lunae a terris distantia. Hora etiam nos proxime (subductis nempe rationibus) certiores efficiet differentiae longitudinis Florentiam inter et Aquas Sextias. Certiores sane efficeremur, si istheic fortassis foret observata lunaris illa eclipsis quae contigit mense Iunio an. 1620, aut alia quae mense Novembri an. 1621; sciremus et differentiam Florentiam inter et Diniam, si alia rursus mensis Aprilis an. 1623, Florentiam vero inter et Parisios, si nupera illa huius anni quae contigit mense Martio: siquidem has omneis ego observavi, consignatasque habeo. Tu si easdem aut alias forte observatas communicare non gravabere, reponam ego, tibique gratias habebo sane quamplurimas.
      Rogo te quam maximo possum animi conatu, ut saltem velis communicare cum Willebrordo Snellio, cuius ignota tibi non est in restituenda geographia sagacitas et sollicitudo. Perscripturus sum ad illum (quod voluit) proximis his diebus non pauca quae habeo huius generis, una cum exacta Aquensis, Genevensis, Lugdunensis, aliorumque pedum, longitudine. Certus vero propemodum sum, ut, cum etiam pedis Florentini desiderarit magnitudinem, imploraverit industriam et humanitatem tuam: seu fecerit seu non fecerit, non poenitebit me egisse apud te illius patronum; ita novi, utrumque vestrum bonarum artium promovendarum perquam studiosum existere.