Si j'y eusse peu trouver les Dialogues de Galilei, je vous en aurois faict achepter un, quoy que vous l'ayez desjà; mais l'engeance en est faillie en ce pays, à cause de la malediction prononcée sur icelluy par la Cour de Rome, où le Galileo a esté citté par les menées du Père Scheiner et des aultres des Jesuites, qui le veulent perdre, et le feroient asseurement s'il n'estoit puissamment protégé du Duc de Florence, qui l'a recommandé à Son Ambassadeur, chez lequel il est logé il y a plus de cinquante jours, d'où il escript toutesfois que personne ne luy a encore rien dict.
      Au reste, je crois vous avoir desja escript plusieurs foys que le Sieur Leo Allatius avoit une sympathie estrange pour affectionner vostre personne, de laquelle luy ayant donné trez ample information, il vouloit faire un long poeme grec, et le fera asseurément, pour vostre Epicure. Mais cependant l'occasion estant survenue d'un livre(175) qu'il faict imprimer, contenant la liste de tous les autheurs qui ont esté à Rome despuis trois ans, il vous y a inséré en termes très advantageux, en parlant du Père Scheiner et prenant son subject que le Père Scheiner estant à Rome, et le Galilei y ayant esté banni auparavant, il ne restoit plus que de vous y voir quelque jour et en suitte de vous paranimpher en termes exquis; et specifie tous vos livres imprimez et à imprimer, n'oubliant l'Epicure....
     
     
     
      2466.
     
      GALILEO a [GERI BOCCHINERI in Firenze].
      Roma, 16 aprile 1633.
     
      Bibl. Naz. Fir. Mss. Gal., P. I, T. IV, car. 93. - Autografa.