Ante annos triginta sphaericam semper credita est emittere lucem, et faciem globosam versus terram ostendere; tubus opticus detegit, illam proprio carere lumine, et corniculatam versus terram descendere. Quis maculas in sole viderat, et tales non planetam Mercurium docuerat? Galilaeus et Apelles et infiniti alii viderunt et quotidie vident; ipseque superiore anno, excepto solis lumine per foramen, maculas grandiores notavi mensibus Augusto et Septembri.... Audieram a Domino Luillerio(304), Galilaeum vocatum decreto Sanctae Inquisitionis, ut ad accusationes responderet quae obiiciebantur ei, tanquam adversus religionem Catholicam et authoritatem Sanctae Sedis Apostolicae haeretica quaedam scripsisset in libello suo de terrae mobilitate. Stupebam et dolebam vicem huius optimi et doctissimi senis; sed gratissimus mihi fuit nuntius, qui Galilaeum ampliatum non solum, sed et absolutum, dixit. Nunquam persuasum habeo, Sanctissimum Dominum nostrum ac Beatissimum Patrem Papam, Christi Vicarium, ad ea quae ad Fidem non pertinent, clavium potentiam extendere velle. Sane si Sacrae Scripturae, vel decretis Summorum Pontificum aut Conciliorum canonibus, adversaretur illa de motu terrae opinio, quanto studio illam, ut verisimiliorem et naturae rerum magis convenientem, tueor, tanta non solum facilitate amandarem, sed et contrario affectu execrarer, illius authores, perfectoque odio prosequerer....
     
     
     
      2552**
     
      GIO. BATTISTA GONDI ad ANDREA CIOLI in Firenze.
      Parigi, 21 giugno 1633.
     
      Arch. di Stato in Firenze.