Aix, 1° febbraio 1634.
     
      Bibl. Nazionale in Parigi. Fonds français, n.° 12772, car. 121. - Autografa.
     
      .... Je fis tenir par le dernier ordinaire de Rome a M.r Bouchard(78) vostre lettre et celle du S.r Hortensius, avec sa Dissertation, pour M.r Galilée, à qui j'escrivis par mesme moyen(79), puisque vous m'y engagiez aulcunement. Et parce que vous m'aviez pareillement engagé envers ledict S.r Hortensius, je me resolus aussy de luy escrire; et ayant veu par sa lettre qu'il n'avoit encore peu recouvrer les Dialogues du Galilée, je mis ordre de lui en faire tenir un exemplaire, estimant que vous n'en seriez pas marry. Mais pour la lettre que vous escriviez au Galilée, je fis punctuellement executer ce que vous desiriez, et retins vostre autographe, que je garderay pour l'amour de vous jusques à ce que vous le veuilliez retirer, n'ayant envoyé qu'une coppie escripte par mon homme(80), avec l'obmission des troys lignes que vous aviez cottées, en quoy j'ay grandement loüé vostre prudance et vostre franchise tout ensemble(81). Car, selon le temps courant, on en eusse peu laisser couller une moitié; mais à la proffession que vous faictes de ne rien dire contre voz sentimentz, il y falloit les derniers mots pour l'interpretation de vostre dire, lesquels pouvoient estre mal prins de personnes mal intentionnées et mal informées de ce qu'il fault sçavoir pour cela en la conjoncture presante: de sorte qn'il vault bien mieux en estre demeuré aux termes generaulx, sur lesquels on ne scauroit jamais rien trouver à dire.