Firenze.
     
     
     
      2931*.
     
      RENATO DESCARTES a MARINO MERSENNE in Parigi.
      [Amsterdam, aprile 1634].
     
      Dal Vol. I, pag. 285-288, dell'edizione citata al n.° 2898.
     
      .... Vous sçavez sans doute que Galilée a esté repris depuis peu par les Inquisiteurs de la Foy, et que son opinion touchant le mouvement de la terre a été condamnée comme heretique. Or ie vous diray que toutes les choses que i'espliquois en mon traitté(271), entre lesquelles estoit aussi cette opinion du mouvement de la terre, dépendoient tellement les unes des autres, que c'est assez de sçavoir qu'il y en ait une qui soit fausse, pour connoistre que toutes les raisons dont ie me servois n'ont point de force; et quoy que ie pensasse qu'elles fussent appuyées sur des demonstrations tres-certaines et tres-évidentes, ie ne voudrois toutesfois pour rien du monde les soustenir contre l'authorité del'Eglise. Ie sçay bien qu'on pourroit dire que tout ce que les Inquisiteurs de Rome ont decidé n'est pas incontinent article de foy pour cela, et qu'il faut premierement que le Concile y ait passé. Mais ie ne suis point si amoureux de mes pensées, que de me vouloir servir de telles exceptions pour avoir moyen de les maintenir; et le desir que i'ay de vivre au repos, et de continuer la vie que i'ay commencée en prenant pour ma devise Bene vixit, bene qui latuit, fait que ie suis plus aise d'estre delivré de la crainte que i'avois d'acquerir plus de connoissances que ie ne desire, par le moyen de mon ecrit, que je ne suis fasché d'avoir perdu le temps et la peine que i'ay employée a le composer.