3080*.
     
      MATTIA BERNEGGER ad ELIA DIODATI [in Parigi].
      [Strasburgo], 15 febbraio 1635.
     
      Bibl. Civica di Amburgo. Codice citato nella informazione premessa al n.° 2613, car. 137t. - Minuta autografa.
     
      Aelio Diodato.
     
      Scripsi paucis ante diebus(685) ad te de Galilaico nostro opere; sed quia non ab re metuo ne litterae illae tardius reddantur, oblata ex insperato hac occasione, paucis argumentum earum repetere placuit.
      Oravi summopere, et nunc repeto preces, ne differas ad me mittere Galilaei tractatum italicum-latinum(686), quem si intra tres adhuc aut summum 4 septimanas accepero, curabo excudatur adhuc ante nundinarum Francofurtanarum exordium, et loco Foscarini (quem separare consultius est) cum Systemate iungatur, in quo adhuc 3 quaterniones excudendi restant. Nunc indicem conficio, quem tamen non committam typographo priusquam responderis. Imago autoris et frontispicium libri in aes inciditur. Explicavi praeterea propositum meum de versione mea autori ipsi dedicanda sic, ut animadverti non possit ipsum fuisse conscium. Prima lineamenta illius epistolae iam duxi. Propter otii summam penuriam metuo ut perpolire possim. Oro perscribas, quicquid ad viri laudes et ad argumentum illius praefationis pertinere videbitur. Si damnas hoc meum institutum et autori putaveris invidiosum futurum, patieris saltem ut te publice alloquar. Certe nemini dicabo unde aliquid lucelli sperare videri queam, quae sordes a me longissime absunt. Legatus Regis, Dn. ab Insula(687), hanc epistolam cum Galilaicis pagellis curabit, et me festinare iussit: haec caussa brevitatis.