Or d'autant que sa façon de philosopher est plus proche de la vraie, d'autant peut-on plus aisement connoistre ses fautes; ainsy qu'on peut mieux dire quand s'esgarent ceux qui suivent quelquefois le droit chemin, que quand s'esgarent ceux qui n'y entrent iamais.
Page 2(899). Il propose ce qu'il veut traiter, a sçavoir pourquoy les grandes machines, estant en tout de mesme figure et de mesme matiere que les moindres, sont plus foibles qu'elles; et pourquoy un enfant se fait moins de mal en tombant qu'un grand homme, ou un chat qu'un cheval, etc. En quoy il n'y a, ce me semble, aucune difficulté ny ancun suiet d'en faire une nouvelle science; car il est evident qu'affin que la force ou la resistence d'une grande machine soit en tout proportionnée à celle d'une petite de mesme figure, elles ne doivent pas estre de mesme matiere, mais que la grande doit estre d'une matiere d'autant plus dure et plus malaisée à rompre, que sa figure et sa pesanteur sont plus grandes. Et il y a autant de difference entre une grande et une petite de mesme matiere, qu'entre deux egalement grandes, dont l'une est d'une matiere beaucoup moins pesante, et avec cela plus dure que l'autre.
Pag. 8(900). Il a raison de dire que les filets d'une chorde s'entretienent, a cause qu'ils se pressent l'un l'autre; mais il n'adiouste pas pourquoy cete pression est cause qu'ils s'entretienent, qui est qu'il y a de petites inegalitez en leur figure, qui empeschent que chascun d'eux ne puisse couler entre ceux qui le pressent.
| |
|
