A pag. 189-190 del Tomo III dell'edizione citata nell'informazione premessa al n.° 1201 è la traduzione italiana di questa lettera, inviata dal DIODATI a GALILEO: cfr. n.° 4021.
     
      Au S.r Diodati. 1 d'Apvril 1640.
     
      Monsieur,
     
      J'ay veu revivre avecq beaucoup de contentement l'illustre dessein que vous avez faict escloire autrefois pour le bien de cest Estat, qui, à mon advis, ne vous est pas redevable de peu du soin que vous continuez de prendre à nous faire tirer les avantages possibles du peu de jours qui reste au Sieur Galilei. Peut-estre soupçonnez vous de la negligence en moy, et vous semble que je soye lent a vous y seconder; mais je puis et doibs vous asseurer en bonne foy, que, depuis celle qu'il vous a pleu m'escrire sur ce subject(410), je n'ay cessé de m'employer avecq vigueur à tout ce qui m'a semblé capable d'avancer l'affaire. Tout revient là cependant, que feu le S.r Hortensius estant venu à mourir, saisy des deniers qu'on luy avoit faict fournir pour le voyage d'Italie, sans que jamais il se soit mis en posture ni debvoir de s'y acheminer; ceste frasque (ainsi l'a-t-on voulu baptiser) a faict refroidir beaucoup de courages, qu'on avoit eu de la peine à rechauffer. Et de faict, tous les quatre personnages deputez à ceste affaire estants venuz à deceder, nous en voyci comme à recommencer, et force nous est de represcher les paradoxes de cest evangile tout de nouveau. C'est, Monsieur, où j'advoüe d'en estre encor pour le present, n'ayant autre assistance que celle de Mons.r Boreel(411), Conseiller et Pensionaire d'Amsterdam, personnage lettré, amateur de bonnes choses et particulierement de celle-cy pour l'interest de la Compagnie des Indes Orientales, de laquelle il est et faict un membre fort considerable; a quoy s'adjoustant qu'il assiste de par sa ville aux assemblées de Hollande, vous pouvez juger le moyen qu'il a de nous servir avecq efficace.