E lee, l'ha pregàa almen de ciappalla per curà i pûj56: e lor l'han ciappada. On dì l'era in giardin e gh'è vegnùu in ment de romp la nizzœula: e gh'è saltàa fœura ona bellissima rocca d'ora57, che la lusiva tant, che tutt i pûj s'hin miss a scappà. La Reginna, la ghe dis a la donzella: - «Guarda on poo quella cialla cosa l'hà fàa, che la fà spaventà tutt i pûj.» - La donzella, la guarda; e la ghe dis: - «Se l'avess de vedè, sura Reginna, che bellezza d'ona rocca d'ora che la gh'ha la pollirœula! L'è tant bella, che la spaventa tutt i pûj!» - E la Reginna, la ghe dis: - «Dimandela de sora.» - E la Reginna, la ghe dis a la pollirœula: - «Cosse l'è che te vœuret a dammela a mì?» - E lee, la ghe dis: - «Nient: solament ona nott a dormì insemma al so marì.» - E la Reginna, la ghe dis: - «Ben, te dormiret.» - Lee, a la sira, la gh'ha dàa l'indormentinna58, che l'ha seguitàa a dormì tutta la nott, el marì. Quand l'è stàa indormentìi el corbattin, la pollirœula la va in lett e la seguita tutta nott: - «O corbatto, o corbattin, l'è trìi ann che viaggio per mare e per terra, ho stracciato tre paja di scarpe di ferro, per venirti a trovà, te.» - E lu, el s'è mai dessedàa. A la mattina, a bon'ora, ghe va là la Reginna e la ghe dis: - «Fuora, fuora, pellegrina, che l'ha da entrar la bella Regina.» - E lee, la s'è levada su; e l'è andada de bass. Quand l'è stàa el mezz dì, la romp la castegna e salta fœura ona pu bell'aspa59 d'ora; la lusiva tant, che tutt i pûj s'hin miss a scappà. Allora la Reginna la ghe dis a la donzella: - «Va on pòo de bass; cosse l'ha fàa quella cialla?