» - Allora la donzella la va de bass, la guarda e la ghe dis: - «Se l'avess de vedè, sura Reginna, che bellezza d'on aspa che la gh'ha la pollirœula! La lussis tant che tutt i pûj se spaventen.» - Allora la Reginna, la ghe dis: - «Dimandela de sora.» - E la Reginna, la ghe dis a la pollirœula: - «Cosse l'è che te vœuret a dammela a mì?» - E lee, la ghe dis: - «Vœuri dorm on'altra nott insemma al so marì.» - Allora la ghe dis: - «Ben, te dormiret.» - La gh'ha dàa ancamò l'indormentinna al marì, che l'ha dormìi tutta la nott. Quand l'è stàa indorment, la pollirœula la va in lett, e la seguita tutta nott: - «O corbatto, corbattin! l'è trìi ann che viaggio, per mare e per terra: ho stracciato tre paja di scarpe di ferro, per venirti a trovà' te.» - A la mattinna a bon'ora, la va in stanza la Reginna: - «Fuora, fuora pellegrina, chè ha da entrare la bella Regina60.» - Allora la pollirœula, la va de bass; e la va ancamò in giardin cont i pûj. Quand l'è stàa mezz dì, la romp el nos. Allora ghe salta fœura ona bellissima carrozzetta d'ora, che la correva attorna per el giardin de per lee61. Allora tutt'i pûj s'hin miss a scappà. La Reginna, la ghe dis ancamò a la donzella: - «Va on pòo de bass, guarda cossa la fa la pollirœula.» - E la donzella la va de bass, la guarda e la ghe dis: - «Se l'avess de vedè, sura Reginna, che bellezza d'ona carrozzetta che la corr de per lee per el giardin! e tutt i puj scappen.» - Allora la Reginna, la ghe dis: - Dimandela de sora.» - E la ghe dis a la pollirœula: - «Cosse l'è che te vœuret a dammela a mi?