» - E lee, la dis; - «Nient. Vœuri dormì on'altra volta insemma al so corbattin.» - La Reginna, la ghe dis: - «Che cialla che te set! L'è minga mêj che te ciappet di danèe? Ten dòo fin che ten vœut.» - E lee, la pollirœula, la ghe dis: - «Vœuri minga on centesim: vœuri dormì on'altra volta insemma al so corbattin.» - El Re, el capiva ch'el stava minga tant ben a bev quella robba là; e lu, inscambi de bevela, l'ha trada via. La Reginna le saveva no. Quand l'è stà indorment, la pollirœula la va in lett e la comincia: - «O corbatt, o corbattin, l'è trìi ann che viaggio per mare e per terra; ho stracciato tre paja di scarpe di ferro, per venirti a trovà te.» - Lu, el comincia a fa andà la testa. Lee, la torna on'altra volta a dì l'istess: - «O corbatt, o corbattin, l'è trìi ann che viaggio per mare e per terra; ho stracciato tre paja di scarpe di ferro, per venirti a trovà' te.» - E lu, el se disseda. Lee, la torna a dì on'altra volta; e lu, el dis: - «Ma chi te set?» - E lee, la ghe dis: - «Sont quella tal, che te m'avevet sposàa e pœu te m'hê abandonada.» - -Allora lu, el ghe dis: - «Come l'è, che t'hê fàa a vegnì chi?» - Lee, la gh'ha cuntàa tutt come l'è stàa. E lu, el ghe dis: - «Ben, mi faròo finta de dormì, quand che ven la Reginna; e ti leva su. Pœu, la pensaròo mi, bella.» - Lee, la mattina a bon'ora, la va la Reginna in stanza e la ghe dis: - «Fuora, fuora pellegrina, chè ha da entrare la bella Regina.» - Lee, l'è andada in lett insemma a lu, la Reginna. Dopo lu, el se disseda, el dis: - «Adess, mi levi su, e ti sta pur chì a dormì.» - E lee, la ghe dis; - «Sì; stòo chi on pòo tard, perchè me senti minga ben.