» - Là gh'era on sant; el dis: - «No, la mia tosa.» - La va innanz e la trœuva on alter uss: - «Minga trovàa pess e pessin, corda e sidellin?» - «No!» - Quell là l'era el ciappin67, le rispond rabbiàa, perchè l'era ona bonna tosa; el ghe dis minga: - «La mia tosa.» - Lee, la picca in d'on alter uss: - «L'ha minga trovàa pess e pessin, corda e sidellin?» - Gh'era la Madonna e la ghe dis: - «Sì, la mia tosa. Sent, te podarisset famm piasèe a fermatt chì intrettant che mi voo via. Mi gh'hoo chi el me fiolin, che te ghe darèe la suppa68; te scovaret, te faret tutt i robb de cà. E mi vegnaròo a cà, te daròo el to sidellin.» - La Madonna, la va via, e lee, la se mett adrèe a fà tutt i robb de cà, la ghe dà la suppa al fiolin, la scova; e in del scovà, invece de trovà rud69, la trovava di coraj, di robb bellissem, insomma robba finna. Lee, la vedeva che l'è minga ruff, e l'ha mess là da ona part, per quand vegneva la Madonna per daghel. La ven a cà e la ghe dis: - «T'hê fàa tutt quell che t'hoo ditt?» - E lee, la dis: - «Sì, ma che la guarda sta robba chì, l'hoo trovàda per terra, l'è minga rud.» - «Ben, tegnela per tì. Te vœut el vestìi de percall o on vestìi de seda?» - E lee le dis: - «No, no, on vestìi de percall.» - E la Madonna invece la ghe da quell de seda. - «Te vœut on didàa de lotton70 o on didàa d'argent?» - «Me le daga de lotton.» - «No, tel dòo d'argent. Tœu, quest chì l'è el sidellin e la toa corda. Quand te set in fin de sto coridor71 chì, guarda per aria.» - Lee, la guarda per aria e ghe ven giò ona bella stella in front.