E lu, el gh'ha ditt: - «L'è chì visin: in fond de sta strada, gh'el so palazzi.» - E là, el gh'ha insegnàa la manera, come el doveva fà, per andà là; perchè l'era on palazzi, ma gh'era minga de porta. El gh'ha ditt, de andà in de quell boschett là, che lor, dopo mezz-dì, van là, i trè tosânn del Re del Sol; e gh'è ona vasca, on laghett; e van denter a novà203. E lu, de scondes in d'on quaj sit; quand ch'el ved, che se disvestissen, de andà là e portagh via i vestìi de sti tosânn. E i tosânn vegnaran pœu fœura e diran: - «Cià, i mè vestìi!» - E lu, che el ghe disa: - «Che me menen de so pader, che mi ghe daròo i vestìi.» - Quel tal omm, el gh'ha insegnàa: - «Ch'el varda, che el Re, el ghè farà fà la scelta de sti tosânn; ma el ghe mettarà ona benda a i oeucc204. «E lu, che el ghe tocca i man. Quella, che el trœuva cont on did môcc205, quella l'è la pusèe bella.» - Come difatti, l'è andàa in quel boschett; e, dopo mezz-dì, hin andàa là i tre tosânn del Re del Sol. E gh'era là ona vasca; e lor van denter à nodà. E lu, el s'è scondùu in d'on quaj sit. Quand ch'el ved, che se disvestissen, l'è andàa là; e el ghe porta via i vestìi de sti tosânn. E i tosânn vegnen pœu fœura e disen: - «Cià, i mè vestìi!» - E lu, el ghe dis: - «Che me menen de so pader e mi ghe daròo i vestìi.» - E lor l'han menàa de so pader. Allora sto giovin l'ha ditt al Re: - «Sont chì per sposà la soa tosa.» - E lu, el gh'ha ditt de sì: - «Diman se farà la sposa: ghe faròo fà la scelta.» - Difatti, el gh'ha miss ona binda a i occ.