EL PEGORÉE272.
Gh'era on fradell e ona sorella. El fradell, l'andava fœura cont i pegor; e, ona sira, ghe ne mancava vunna. El va a cà a piang a piang. Ma la soa sorella, insomma, l'era rabbiada, perchè ghe mancava sta pegora; e la ghe dis: - «Guardet ben, che se te vegnet a cà ona quaj altra sira cont ona pegora de men, te podet lassà stà de vegnì in cà.» - Lu, el ven on'altra sira, che ghe ne mancava on'altra anmò. El compagna i so pegor fin a l'uss e pœu l'è tornàa via, perchè el gh'aveva pagura de andà in cà de soa sorella; e l'è reussíi a vess in d'on bosch. El sent di pedann273, el gh'aveva pagura, el va in su ona pianta. Là ghe se ferma tre donn. Sti donn eren tre strij: se metten a discorr di striament274 che aveven faa quella sira. E vunna la dis: - «Mi hoo instriàa la tosa del Re, e gh'è nissun che pò falla guarì, qualunque275 dottor ghe vaga, gh'è nissunna medesinna bonna. Varda» - la dis - «mi l'hoo instriada e per fagh andà via l'instriament, bœugna che ciappen on boggettin e che vaghen in de la tal fontanna a impienill de quell'acqua là e che ghel daghen a gotta a gotta a gotta a gotta e savè fà anca a daghel. Allora la guarirà.» - Sto fiœu, el sent tutti sti discors, che faven lì sti donn, el dava a trà276 quel che diseven e el stava lì quiett, quiett, quiett. E lu, dopo, i ha lassàa andà via e l'è vegnùu giò e l'ha ditt: - «Coss'hoo de fà mi adess chì? Bœugna, che vaga distant, innanz che mia sorella vegna a savè che mi sont di sti part chì!» - L'è andàa, e l'è andàa a cercà on sit de trovà de servì, de fa el servitor de stalla, perchè l'era on pajsanell277, per podè trovà de guadagnà on poo de pan de mangià. L'era on trì o quattr ann che l'era via, soa sorella la saveva pu nient dove l'era, no l'aveva nè nœuva nè ambassada.
| |
|
