El cœugh, el vedeva, ch'el so padron el cantava pu; l'era semper con la testa poggiada al tavol; e el gh'ha domandàa cossa l'è, ch'el gh'aveva. E lu, el gh'ha cuntàa su. El cœugh, el gh'ha ditt, s'el ghe dava la metà de la soa sostanza, el ghe despediva lu sta robba. El gh'ha ditt de dagh la pell d'on asen mort, on carrett de corda e el so ponc e el so tabarr. E l'è andàa lu del Re, sto cœugh. E el Re, el gh'ha ditt: - «Sicchè, quanti stell gh'è in ciel?» - E el gh'ha ditt: - «Ch'el cunta sti pel de st'asesin chì, ch'el savarà quanti stell gh'è in ciel.» - E el Re, el gh'ha ditt de cuntaj lu; e el gh'ha responduu, che la soa part l'era già cuntada, che adess el toccava al Re a cuntaj. E el gh'ha ditt: quanti brazza de corda ghe voreva per andà in ciel. E lu, el gh'ha ditt: - «Tì, ciappa la corda de andà su finna in ciel» - e pœu de vegnì giò e cuntà quanti brazza eren. E pœu, el gh'ha ditt: - «Coss'è che pensi mi?» - «Lu, el pensa che mi sia on abbàa e invece sont el cœugh e gh'hoo chi la cazzirœula de fagh provà el brœud.» -
     
     
      VI. I DUU MAI CONTET299.
     
      Gh'era ona donna, che ciamaven Chiara. L'era povera; l'andava a cercà la caritàa e a tœu su el rud300 per i strad. On dì l'ha trovàa ona gianda de zucca e l'ha piantada. Poch temp dopo, de quella gianda è cressùu ona pianta, che la rivava finn a al ciel. So marì, el ghe dis: - «Te dovariet rampegà su quella pianta; e andà del signor, a domandagh, de dann almen pan assèe.» - E lee, l'andava su e - «Tacch, tacch!» - «Chi l'è?» - «L'è la povera Chiara, che gh'ha bisogn ona grazia.