Eren l'anima di sti tre tosann.
     
     
      X. CICCIN BORLIN
     
      Gh'era ona volta on fiœu, che se ciamava Ciccin Borlin309. E la soa mamma, on dì, la ghe dis: - «Mena i bœu a mangià in quel praa là. Te faroo on bel chisciœu310; tel mangiaret intant, ch'el bœu, el mangia.» - Ciao, el fiœu el va cont el chisciœu e el bœu. Quand l'è là, el sent ona vos sott terra, che la dis: - «Ciccin Borlin, cascia dent el to didin, in del chisciotin311 e te vedaret tanti bej robb.» - Lu, l'ha casciàa denter; ma apenna l'è staa dent el dit, el s'è trovaa sott terra; el s'è trovaa cont ona stria veggia veggia, che l'ha miss in caponera, e l'ha lassaa dent on mes. Quell di duu mes312, la va là attacch a la caponera, e la dis: - «Gigin Borlin, cascia fœura el to didin, per vedè se te set deventaa grassin.» - E lu, invece de cascià fœura el dit, l'ha casciaa fœura on ciod. E la veggia, la fa: - «Sta denter, sta denter, che te see magher ancamò.» - De lì a on poo de temp, i tosann de la stria ghe disen a la soa mamma: - «Nun vœurem mangià el Ciccin Borlin; grass sì, grass no, nun el vœurem mangià.» - E la veggia, la fa: - «Com'hoo de fà a fall morì?» - «Ti, tirel fœura della caponera; e mett su on caldar d'acqua bujenta313; e digh, de fà sott et fœugh. Quand l'è drèe a fà sott el fœugh, vagh de drèe, ciappel per i gamb e buttel denter in del calder de l'acqua calda.» - Ciao, i tosann van via; e la mamma, la va a tirà fœura Ciccin Borlin de la caponera, e la ghe dis: - «Ven chì, a fà sott el fœugh.» - E lu, el dis: - «Mi sont minga bon; famm vedè come se fà.» - E lee, la ghe fà imparà; e lu, el va de drèe, le ciappa per i gamb e le butta in del caldar.