Item statuimus ut, si de praesenti infirmitate nos mori contigerit, in majori ecclesia Panormi, in qua divi Imperatoris Henrici, et divae Imperatricis Costantiae parentum nostrorum memoriae recolendae tumulata sunt corpora, corpus nostrum debeat sepeliri. Cui ecclesiae dimittimus uncias auri quingentas pro salute animarum dictorum parentum nostrorum, et nostrae, per manus Berardi venerabilis Panormitani Archiepiscopi, familiaris et fidelis nostri, in reparatione ipsius ecclesiae erogandas.
      Praedicta autem omnia, quae acta sunt in praesenta dicti Archiepiscopi, Bertoldi Marchionis de Bemburgio dilecti consanguinei et familiaris nostri, Riccardi Comitis Casertani dilecti generi nostri, Petri Ruffi de Calabria Maniscaliae nostrae Magistri, Ricardi de Montenigro Magnae Curiae nostrae Magistri Justitiarii, Magistri Joannis de Ydronto, Fulconis Ruffi, Magistri Joannis de Procida, Magistri Roberti de Panormo Imperii, et Regni Siciliae, et Magnae Curiae nostrae Judicis, et Magistri Nicolai de Brundusio publici Tabellionis Imperii, et Regni Siciliae, et Curie nostrae Notarii nostrorum fidelium: quos praesenti dispositioni nostrae mandavimus interesse per praedictum Corradum filium et haeredem nostrum et alios successive, sub poena benedictionis nostrae tenaciter volumus observari, alioquin haereditate nostra non gaudeant. Id autem fidelibus omnibus nostris praesentibus, et futuris, sub sacramento fidelitatis, quo nobis et haeredibus nostris tenentur, injungimus ut praedieta omnia illibata teneant, et observent.