Praesens autem testamentum nostrum, et ultimam voluntatem nostram quam robur firmitatis volumus obtinere, per praedictum Magistrum Nicolaum scribi, et signo Sanctae Crucis propriae manus nostrae, sigillo nostro, et praedictorum subscriptionibus jussimus communiri. Actum apud Florentinum in Capitanata anno, mense, die, et indictione praemissis, anno Imperii nostri trigesimo secundo, Regni Jerusalem vigesimo octavo, Regni Siciliae quinquagesimoprimo.
      † Ego Fridericus Secundus Divina favente clementia Romanorum Imperator semper Augustus Hierusalem et Siciliae Rex dico et declaro hoc fuisse et esse meum solemne testamentum, meamque ultimam voluntatem, actum est scriptum de mei ordine, voluntate, et mandato per manus Magistri Nicolai de Brundisio publici Tabellionis Curiae nostrae, ac in praesentia supradictorum et infrascriptorum testium nostrorum fidelium, quos omnibus praedictis mandavimus interesse, ac in fidem omnium praemissorum manu propria subscripsimus, nostroque solito Imperiali et Regio sigillo signavimus.
      † Ego Berardus Archiepiscopus Panormitanus rogatus praemissis omnibus interfui, manu propria me subscripsi ac sigillo Imperiali et Regio signavi.
      † Ego Marchio de Bemburgio praesens fui, manu propria subscripsi, sigilloque Imperiali me signavi.
      † Ego Ricardus Comes Casertinus rogatus supradicto Imperiali testamento interfui, manu propria me subscripsi, supradictoque Imperiali ac Regio sigillo signavi.
      † Ego Ruffus de Calabria rogatus supradictis omnibus interfui, manu mea subscripsi, et Imperiali ac Regio sigillo me signavi.