Estote itaque fortes in bello et cum antiquo serpente pugnate, et quasi modo geniti infantes rationabile sine dolo lac concupiscite libertatis, ut accipiatis justitiae gratiam in praesenti et calamitatis fugiatis miseriam in futuro. Valete, carissimi. Datum Panormi XIII die aprilis X indictione.
      Gregor. Bibl. Ser. Arag. Tom. II, pag. 145.
      XLII.
      Sanctissimo Patri eorum, et Domino, Domino papae Martino Sancte Romanae ecclesiae Summo Pontifici, Domini nostri Jesu Christi in terra vero Vicario, Petri apostolorum principis successori, ac totius christianae religionis antistiti generali; universitas Siculorum terrae osculum ante pedes et flexis poplitibus, ac manibus cancellatis.
      Dudum, Sanctissime Pater patrum, loqui formidavimus, os in coelum ponere titubantes, sed ne taciturnitatis longa praescriptio per amplius delicta nostrarum videatur exaggerare culparum, si molestias ac jacturas innumeras ab altero Pharaone et ejus satellitibus infrunitis, nobis illatas inremissibiliter, et etiam incessanter personae vestrae conscientiae, si possemus, notas facere minime curaremus, atque ideo vestrae sinceritatis pectus agnoscat, in cujus propitiationis tabula scientiae perspicacis, virgam salutiferae correctionis et manna mellifluae pietatis absque ullius ambiguitatis errore fore credimus ministerio spirituum supernorum immissorum de imperio primae causae, quod Gallicana gens effera absque consilio et sine prudentia, cujus intuitus ad praesentia tantum et nunquam ad novissima figebatur, illa gens videlicet data nobis desuper forsan ad nostrorum piaculum peccatorum, quae suis culpis exigentibus passa est exterminium personale, subscriptis nos cladibus affligebat.