Nam putavimus in ipsorum dominationis primordio, praedecessorum exactorum sepultis jurgiis importunis, sub pacis copia et opulentia, requie gaudere et bonis habitis et habendis, quoniam gens sancta populus peculiaris Domini a membris Ecclesiae dicebatur, et unde credidimus provenire subsidium, inde, proh dolor, invaluit intolerabile detrimentum, quoniam distractis bonis mobilibus, ubicumque poterant reperiri et domibus dirutis debitorum, populares et nobiles, mares et feminas, juvenes, virgines, senes et etiam juniores manicis ferreis immisericorditer alligabant, esculenta et poculenta negantes taliter alligatis, donec impiis exactoribus satisfieret de pecunia postulata. Qualiter insuper a ministris impietatis caederemur diversis generibus flagellorum, cum unusquisque ipsorum pugionem semper ad latus, gladium super femur, baculum seu clavam in manibus deportaret, nos scimus, qui inermes et caesi ante faciem persequentium absque fortitudine migrabamus, sed nostris cervicibus minabamur, lassis requies non dabatur. Mirum in modum cessaverat inter nos gaudium tympanorum et qui solebamus inter alios de Europae climatibus singularibus pollere tripudiis, in ficus fatuas et salices steriles suspendebamus organa super flumina Babilonis. O confusio confusi populi, quem Deus non homo confusibiliter sic confundit! flagellis et bonorum distractionibus non contenti, ad raptum filiarum nostrarum, sororum pariter et uxorum impudentius satagebant, violenter pudicas virgines violantes, et immaculatos thoros turpiter maculantes.