Solum civitatis opertum est floribus, parietes auratis vestibus rutilant, et domorum tecta, maxime qua Rex ad Regale palatium ducitur, resonant melodiis; ingressus est ergo Rex comitante gloriosa turba palatium, atque declinans ab equo spectabilis, ad ulnas gloriose matris suscipitur; et dum ei manuum oscula cum reverentia prestitit, maternos quidem amplexus cum beneditione suscepit. Exultat, inquam, diligens mater in filio, et gloriosus filius in reverenda genitrice letatur. Yolanda virgo regia fratrem Regem amplectitur, quem ab ipsis cunabilis inter fratres alios preamavit. O felix mater in prole spectabili, et gloriosa nimis in cospectu regnantium filiorum. O soror, quantum forsitan ab hujus dilecti fratris amplexu tepesceres, si te ipsius fratris hosti futuram conjugem estimares? - Ivi, Tom. I, pag. 356.
      XLIX.
      Fridericus Tertius Dei gratia rex Siciliae, Ducatus Apuliae et principatus Capuae ec.
      Insulam et fideles nostros Siciliae a nostrorum hostium insultibus et insidiis defensare conantes, cum nostro extolio die veneris tertio praesentis mensis julii in sero pervenimus ad maritimam S. Marci de valle Deminae, ubi intellexerat nostra serenitas praedictorum hostium galeas insistere, et sequenti die sabbati quarto ejusdem in praedictas galeas hostium morantes ibidem viriliter et animose irruimus, et dum pugna inter utrumque extolium committeretur, et fortuna et casu accideret, quod tam galea, in qua eramus, quam multae galeae nostrae, videlicet meliores et magnae et sufficienter armatae, per quarum vigorem et potentiam sperabamus in domino de praedictis hostibus obtinere victoriam, sic intra seipsas remis involutae, et impeditae fuerunt quod aliqua ipsarum contra praedictas galeas hostium pugnare non potuit, qua de causa de galeis nostris a sexdecim usque ad decem et octo per praedictas galeas hostium captae fuerunt nobis, omnibus aliis galeis dicti nostri extolii redeuntibus in Messanam.