Nos enim habita certitudine de processibus praedictorum hostium, quod intendant agere, et versus quas partes procedere, quocumque illos velle declinare sciverimus, et nostrum succursum et auxilium magis necessarium fore videbimus, inter nostrum cum toto exfortio post se cum nostris feliciter dirigemus. Datum Messanae VI julii XII indictionis regni nostri anno IV.
      Ivi, Tom. II, pag. 175.
      L.
      Fridericus Dei gratia rex Siciliae, ducatus Apuliae et principatus Capuae, universis hominibus civitatis Panormi.
      Ut vestra et nostrorum corda fidelium de nostrorum felicitate successuum festive jubilationis gaudiis hilarescant, vobis tenore praesentium ad gaudium annunciamus, quod per illius gratiam, qui causam nostram pio favore prosequens et defendens, manus nostras ad praelium docuit, et digitos nostros ad bellum, hodie primo praesentis mensis decembris hujus XIII indictionis in campis infra terras Trapani et Marsaliae de illustri Philippo filio Caroli hostis nostri, qui se Tarentinum scribebat in principem, et terrestri exercitu, cum quo in Siciliam infeliciter declinarat, per nos nostrumque victoriosum exercitum feliciter obtenta victoria, eodemque Philippo, nec non filio comitis Thomasii de S. Severino, Hugone de Viezi, Vilielmo de Ammigdala, et aliis quampluribus nobilibus et equitibus aliis captis, et in nostro carceri mancipatis, reliqui omnes fuerunt in ipso praelio in manu forti, et extento brachio interempti; ita quod de sexcentis equitibus et peditibus aliis, quos in Siciliam cum eodem principe infelicia eorum fata traxerunt, nullus manus nostras evadere potuit, quin in ipso conflictu potentiae nostrae gladio trucidatus extiterit, aut nostro fuerit ergastulo carceris mancipatus.