Quae unitas firmata tempore veris anni tertiae indictionis primo tunc sequentis, idest anno a nativitate Domini MCCCXX, et proinde idem rex Fredericus faciens colloquium XVII julii ejusdem tertiae indictionis in Messena cum syndicis totius Siciliae, manifestavit eis dictam unitatem fecisse, et misit propterea postea infra octo fere dies, videlicet post dictum colloquium; ab insula Siciliae ad civitatem Januae galeas quadraginta armatas per eum infra menses madii, junii et julii ejusdem anni, simul cum galeis undecim dictorum Januensium gibillinorum, quae venerant ad associandas dictas galeas Siculorum; in quo viagio dictae galeae transeuntes per Calabriam destruxerunt Policastrum, videlicet hospitia, vineas et jardina dictae terrae, et interficientes etiam homines terrae ipsius, et deinde iverunt ad Isclam, et illius vineas, et jardina, ac arbustos incidentes, et devastantes, recesserunt abinde euntes ad..... quam similiter devastaverunt: et postea in principio sequentis mensis septembris pervenerunt ad portum Januae, et tenentes ipsam per aliquos dies obsessam, iverunt demum ad terram Vulturi, et ipsam violenter ceperunt, interficientes viros, et mulieres, pedites, et equites, magnos, et parvos terrae, a nativitate Domini praedicto anno MCCCXX. Et sic deinde euntes galeae ipsae per ante portum Januae, et dantes ipsi civitati per mare, et per terram assaltum, et nequeuntes de dicta civitate aliqui obtinere: et deinde euntes ad alia loca ripariae Januae, in fine dicti mensis septembris recesserunt abinde, redeuntes in Siciliam die dominico nono novembris dictae quartae indictionis.