Pro cujus guerrae expensis faciendis idem dominus rex Fredericus rex Siciliae imposuit in ea insula Siciliae cassiam unam, dictam cassiam propter guerram, quae solvuntur mirando, et exeundo cum rebus mercimonii quibuscumque, a primo die dicti mensis septembris ejusdem quartae indictionis in antea, ob quam solvuntur tria per centum.
      Redditus etiam honorum ecclesiarum singulorum ecclesiae cepit dicto primo die dicti mensis septembris in antea in subsidium expensarum praedictarum, pro quorum reddituum captione idem dominus rex vocavit ad se praelatos dictarum, per ejus literas formae talis.
      Fridericus Dei gratia rex Siciliae religioso viro abbati s. Spiritus de Panormo devoto suo salutem in Domino Jesu Christo.
      Cum pro structione, reparatione, munitione, et armatione galearum nostri felicis extolii, quod in proximo futuro vere in maiori numero et forti, quo fieri potuerit, construi, reparari, muniri, et deinde feliciter armari providimus, ad defensionem, et statum prosperum tam nostrorum fidelium, quam monasteriorum, et ecclesiarum quarumlibet procurata indemnitas, et tranquillitas agitur possessorum; ad quod perficiendum, ut expedit, proventus, et jura insulae nostrae Siciliae bono modo sufficere non videntur: diligenti communicato consilio, ne tot, et tanta necessaria, et opportuna servitia remaneant imperfecta; provisum et determinatum extitit, quod de omnibus juribus, proventibus, et redditibus singularum ecclesiarum, nec non quorumlibet archiepiscoporum, episcoporum, abbatum, priorum, nec non canonicorum, et beneficialium quorumlibet insulae nostrae Siciliae a primo septembris proxime futurae quartae indictionis in antea, in praedicta forma, et pro dicta causa pecuniale subsidium recipere, et habere penitus debeamus.