Si trova un mircanti affacciatu, e vitti passari a chistu cu stu sceccu, e cci dissi: — «A tia, lu vô' vinniri?» — 'Ccillenza sì; però facemmu322 un pattu, cci dici lu mircanti: tu metti lu sceccu e i' la mircanzia; si tu ti fidi cuntari un cuntu senza diri si raccunta, vinci la mircanzia; si dici si raccunta, perdi lu sceccu.» Piglià'323 lu viddanu e cci dici: — «Gnursì.» Lu mircanti cci dici: — «Quantu tempu vô' pi cuntari lu cuntu?» Lu viddanu cci dici: — «Vogliu tri jorna di tempu;» passannu li tri jorna, lu mircanti cci dici: — «Cunta lu cuntu:» Piglia lu viddanu e dici: — «Sugnu ad ordini» — «Principia:» — «Si cunta e si raccunta:» dissi lu viddanu; rispusi lu mircanti: — «Ha' persu: pricchì lu pattu fu chistu, di cuntari lu cuntu senza diri si raccunta.» Allura lu viddanu dici: — «Haju persu:» cci lassa lu sceccu e si nni va. Arrivannu a lu sò paisi, si junci cu li so' frati, e cci dici: — «I' jivu324 a Calamonaci, e jivu a vinniri lu sceccu, e s'a truvatu un mircanti affacciatu, e mi dissi si vulia vinniri lu sceccu; i' cci dissi di sì; mìsimu 'na scummissa, e i' la persi; e cci vosi325 dari lu sceccu.» A stu discursu pigliammu a chiddu chi appi lassatu lu sidduni, ca si nni ji' a lu stissu paisi, e nni lu stessu mircanti, pi vinnirci326 lu sidduni: e cci fici lu stessu pattu, e persi lu sidduni. Va chiddu cu la cigna, nni lu stessu mircanti, pi vinniriccirla, e ficiru lu stessu pattu, ca chiddu mintía327 la cigna, e lu mircanti la sò mircanzia; e cci dici: — Quantu tempu vô'?» Lu viddanu dissi: — «Vintiquattr'uri;» passati li 24 uri lu mircanti la chiama, e cci dici — «Va, vidi ca è ura di cuntari lu cuntu.