Si tu 'un cci vai, io ti cuntu un cuntu!» La signura 'na cosa ca si misi 'n fantasia: — «Ora, nanna, (dici) jitivìnni, ca io 'un pozzu vèniri.» E la vecchia si nni iju. Comu si nni iju, la signura iju nni lu pappagaddu, e lu pappagaddu cci cuntò stu cuntu.
     
      Primu cuntu di lu pappagaddu:
     
      'Na vota cc'era un re; stu re avia unica figghia, e sta figghia si dilittava di pupi; e nn'avia una ch'era lu sò dilìziu365. Idda la vistía, idda la spugghiava, idda la curcava, 'nsumma cci facía zoccu si fa a li picciriddi. 'Na jurnata lu Re vosi jiri 'n campagna; e la Rigginedda si vosi purtari la pupa. Jucannu jucannu, allianata pusò sta pupa supra lu vùsciu366. Fu ura di tavula, e si nni iju a manciari. Ddoppu manciari, si misiru 'n carrozza e si nni jeru a lu palazzu riali. La Rigginedda chi si va a scorda367? la pupa!
      'N forma ca juncèru a lu palazzu,368 si rigurdò la Rigginedda di sta pupa. Chi fa! a locu d'acchianari susu, vôta tunnu e si nni va pi jiri a circari la pupa. Niscennu fora li porti si spersi; java 'nta li paisi, e era comu 'na 'ntamata369. Juncennu 'nta un palazzu riali, spija cu' era lu re di stu palazzu. «Lu Re di Spagna» cci dicinu. Idda prega pi alluggiamentu. Trasíu; lu Re cci ha datu alluggiamentu, e fici cuntu ca chista cci vinía figghia. Chista si 'mpalazzò, e accuminciò a essiri la patruna. Iddu, lu Re, figghi 'un n'avia; cci detti libbirtà di fari e sfari, e cci detti macàri dudici dunzelli riali. Ora comu la 'mmìdia è 'nta li pari,370 li dunzelli accuminciaru a cuntrarialla.