Dicinu: — «Viditi! Chista cu' sa cu' è! e havi a essiri nostra Rigginedda! Ora sta cosa havi a finiri!» Lu 'nnumani cci dicinu a la Rigginedda: — «Cci viniti cu nui?» — «No, pirchì lu papà nun voli. Si voli iddu, vegnu.» — «Sapiti allura chi aviti a fari pi farivicci vèniri? dicìticci: Pi l'arma di sò figghia mi cci facissi jiri. Comu iddu senti accussì, subbitu vi la cuncedi.» La Rigginedda accussì fici; ma comu lu Re cci 'ntisi diri: Pi l'arma di sò figghia! — «Ah! scilirata, cci dissi lu Re; subbitu jittàtila 'nta lu trabbuccu!»
      Cumu la Rigginedda cadiu 'nta lu trabbuccu truvò 'na purtèra; poi n'àutra, poi n'àutra, sempri a tantiari371. A certu puntu tocca comu l'orvi, e tocca isca e surfareddi372. Jetta isca, adduma un cannileri chi cc'era ddà, e vidi 'na bella giuvina c'un catinazzu 'mmucca, ca 'un putía parrari; ma cu l'atti cci dicia ca pi gràpiri, la chiavi di lu catinazzu era sutta lu cuscinu di lu lettu. La Rigginedda la pigghiau e cci grapíu lu catinazzeddu; allura la picciotta parrau, e cci cuntau ca era la figghia di lu Re, ca si l'avia arrubbatu un magu; stu magu ogni menzijornu cci purtava di manciari, e poi cci chiuija la vucca, e si nni parrava lu 'nnumani a grapiriccilla arrèri373. — «Ma dimmi, cci dissi la Rigginedda, chi rimèddiu cc'è pi libiràriti?» — «E io chi sàcciu! Autru 'un pozzu fari chi spijàricci a lu magu quannu mi grapi la vucca; tu ti stai sutta lu lettu, e accussì senti e poi cci pensi tu zoccu374 ha' a fari.» — «Bona! bona!» La Rigginedda cci 'nchiuj la vucca, sarva la chiavi sutta lu cuscinu e si 'nfila sutta lu lettu.