Ma a la menzannotti si senti un gran fracassu; si sbarrachía la terra: lampi, fumu, fetu di sùrfaru, e cumparisci lu magu ca 'na toga di magu. Appressu di lu magu un giaganti c'un tabbarè di manciari, e dui stafferi cu du' torci pi fari lustru; nni manna li stafferi e 'nchiuj; pigghia la chiavi e cci grapi la vucca a la figghia di lu Re; mentri manciavanu, idda cci dissi: — «Magu, mi passa un pinseri: pi cusiritati, chi cci vurrissi pi io nèsciri di ccà?»375 — «Assai vôi sapiri, figghia mia.» — «Lassàti jiri ca nun lu vogghiu sèntiri.» — «Puru ti lu vogghiu diri. Cci voli ca si facissi 'na mina tutta 'ntornu a lu palazzu; a menzannotti 'n puntu, quannu io staju pi tràsiri ccà, cci dassiru focu; scatta la mina, tu ti trovi cu tò patri, e io sâtu pi l'aria.» — «Comu si 'un l'avissivu dittu a nuddu,» dici la picciotta. Lu magu si vistiu e si nni iju. Passannu 'na para d'uri, niscíu la Rigginedda di sutta lu lettu, si licinziau cu sò suruzza, ca già la chiamava suruzza, e si nni iju...
      Camina 'nta lu trabbuccu, e va e va. A certu puntu si ferma e chiama ajutu. Lu Re la 'ntisi e cci fici calari 'na corda. La picciotta acchianau, e s'apprisintò a lu Re, e cci cuntau tutti cosi. Lu Re alluccutu, accuminzò a fari fari sta mina, china di palli, prùvuli e pirticùna; quannu fu bella tipa tipa,376 la picciotta scinniu c'un ròggiu, e iju nni la picciotta: — «O morti tutti dui, o vivi tutti dui!»
      Trasíu: — «Sugnu ccà io.» Cci livò la catinazzeddu di la vucca, ficiru li so' discursi, e poi si licinziau: sutta lu lettu! senza lassari nuddu rastu377. Ma juncennu l'ura vinni lu magu, e lu Re a l'asserva cu lu roggiu a li manu378. A la menzannotti a picu, idda duna focu a la mina: bbuhm! e si senti la gran battaría: lu magu addivintò pruvuli e spiríu, e li dui picciotti si truvaru abbrazzati e fôru libbiri tutti dui.