Arrivannu a li dicidott'anni, cci vinni un matrimoniu, e cci vinni un Re Turcu. Comu idda 'ntisi ch'era Re Turcu dissi: — «Io chi vogghiu turchi!» e lu disprizzau. Passannu 'na pocu di tempi cci vinni 'na gran malatia, senza sapiri canusciri li medici chi malatia avia sta picciotta: cummursioni, si turcía comu 'na ligama, l'occhi darreri lu cozzu, e 'un si putia pinitrari chi era.379 Lu poviru patri confusu tuccò campana di Cunsigghiu: — «Ora, Signuri mei, io (dici) haju sta figghia mia chi mi perdi tirrenu di jornu 'n jornu380; chi cunsigghiu mi dati?» Dicinu li Savii: — «Maistà, sapiti ca cc'è 'na picciotta, chi cci fici attruvari la figghia a lu Re di Spagna; circàti di chissa, ca chissa vi dici chi cci voli pi vostra figghia.» — «Evviva! lu cunsigghiu mi risurtò prupiziu!»381
      Ordini di stu re ca partissiru vascelli pi jiri a pigghiari a sta picciotta; «e si lu re di Spagna 'un vi la voli dari, lassàticci stu 'nguantuni di ferru382, e dichiarati la guerra!» Si parteru li vascelli e 'na matina si truvaru a Spagna. Ficiru 'na gran sarviata; scinni lu 'Mmasciaturi; s'apprisenta a lu Re, e cci duna 'na littra siggillata. Lu Re grapiu; liggennu liggennu si misi a chianciri: — «Io mi cuntentu la guerra, e no dari sta figghia...» 'Nta mentri trasi la figghia: — «Chi aviti, Maistà? (e vidi la littra) E chi paura aviti! Ora cci vaju nni stu re.» — «Comu! figghia mia, 'unca accussì mi lassi?» — «E tornu arreri. Vaju a viju chi havi sta picciotta, e sugnu arreri ccà.»
      Va nni la surastra; si licenzia, e parti.