Comu junci, lu Re cci iju a lu 'ncontru: — «Figghia mia, si mi libbirati a sta figghia malata, io vi dugnu la mè curuna!» — E su' dui cu li curuni! — dissi 'ntra idda. — «Io la curuna l'haju, Maistà. Videmu chi cc'è, e lassamu li curuni.» Va e vidi a sta picciotta tutta sminnittiata. Si vôta cu lu re: — «Maistà, facitimi pigghiari vrodi e cosi di sustanza.» Subbitu fôru pronti. — «Io mi 'nchiuju383 cu vostra figghia; e 'un aviti a gràpiri, pirchì 'n termini tri jorna, o vi la dugna viva, o morta. E sintìti chi vi dicu: ca si puru vi tuppulíu, mancu m'aviti a gràpiri.» Tutti cosi fôru pronti; si 'nchiuiju e misi ferri e catinazzi. Chi si va a scorda? l'isca p'addumari la cannila la notti! La sira cci vinni 'na gran cunfusioni. 'Un vulennu tuppuliari, affaccia di lu finistruni di la cammara, e vidi un lumi luntanu luntanu; pigghia 'na scaletta di sita e scinni cu 'na cannila pi jilla a 'ddumari. Comu 'ncugna nna ddu lumi, vidi 'na gran quadara pusata supra li pitruna, e 'na carcàra di sutta; e un turcu cu 'na ferra chi arriminava. — «Chi fai, turcu?» — «Lu mè Re vuliri figghia di lu Re; idda 'un lu vuliri; fari magaria.384»
      — «Mischinu, lu mè turchiceddu! Tu si' stancu, è veru? sai ch'ha' a fari? stanca385 tantìcchia ca arrimìnu io. — «Sì, pi Maumettu!» Iddu scinníu; idda acchianò, e misi a 'rriminari cu la ferra. — «Cci vaju bona accussì?» — «Sì, pi Maumettu!» — «E allura, tu dormi, cà arriminu io.» Comu iddu pigghiò sonnu, idda scinni, l'afferra e lu sdivàca386 'nta la quadàra vugghienti.