Mannati a pigghiari a chissa. Si sò patri 'un vi la duna, 'ntimàticci la guerra.»
      Lu Re manna li 'Mmasciaturi: o chi cci mannava sta figghia cu lu bonu, o cu lu reu. Mentri cc'eranu li 'Mmasciaturi davanti lu Re di Spagna, trasi la figghia, chidda ch'avia fattu ddi spirtizzi; e lu trova cunfusu. — «Chi aviti, Maistà?» — «Nenti, figghia mia; vinni 'n'àutra cugnintura; ti voli n'àutru re. Voli diri ca io 'un pozzu essiri cchiù patruni di tìa!» — «Nenti, Maistà; lassatimi jiri, ca 'nta pocu tempu tornu.»
      Si 'mmarca cu la sò Sirvitù, e si nni va pi lu sò bon viaggiu. Comu chista trasi e vidi a lu Riuzzu chi s'agghiuttìa393 dicennu sempri: — «Ih! È bedda la pupa! cunsiddirati la patruna!», dici: — «All'urtimu mi chiamastivu! Ma puru, datimi ottu jorna di tempu: facìtimi tràsiri 'nguenti, manciari; e all'ottu jorna, o vivu e bonu, o mortu.»
      Si 'nchiuj e attenta pi sèntiri chi dicia lu Riuzzu, ca già 'un si sintía cchiù zoccu dicia; avia l'arma 'mpinta a li labbra394. Comu lu senti parpagghiari: «Ih! è be...dda la pu...pa; cun...siddi...» e vidi la pupa. — «Ah! sciliratu! dici idda, vui l'aviti la pupa mia! Lassàti fari a mia, ca ora v'aggiustu io.» Comu iddu cci senti diri sti palori, accussì iddu arrivinni. — «Vui siti la patruna?» — «Io sugnu!» Figurativi; turnò a li vivi. Idda accuminzò a dàricci vrodu 'nsina ca lu fici risturari. Quannu fu risturatu: — «Ora cuntàtimi comu aviti sta pupa?» cci dici la picciotta; e lu Riuzzu cci cuntò tutti cosi. P'accurzari, all'ottu jorna iddu, lu Riuzzu, era bonu.