III.
     
      Li Figghi di lu Re di Spagna.
      Si cunta e s'arriccunta a vuàutri signuri ca 'na vota cc'era e cc'era un Re di Spagna. Stu Re di Spagna aveva dui figghi fimmini; una si l'avianu pigghiatu li fati, e l'àutra cci avia arristatu nna lu sò palazzu. Sta figghia chi cci avia arristatu avia 'na pupa ch'assimigghiava tutta scurciata a idda,398 e perciò la visteva di li so' robbi, e la mitteva bedda assittata nna lu finistruni chi spuntava nna lu jardinu di la cità. 'Na jurnata la figghia di lu Re di Purtugallu trasíu nna lu jardinu, e vidennu sta biddizza 'strema ristau alluccutu; ma, taliànnula attentamenti, vitti ch'avia lu cozzu spizzicatu399, e chi perciò era 'na pupa bella e bona. E chi faci? iju a circari 'na scala, la porta nna lu jardinu, l'appuntidda a lu muru,400 nna lu finistruni, e si porta la pupa nna lu sò palazzu. Ddà si 'nchiuj cu sta pupa, cci adduma 'na pocu di cannili, e notti e jornu si metti a prigalla addinucchiuni. Lu manciari si lu facia pròjiri di 'na 'ngagghidda di la porta401.
      Lassamu stari a iddu, e pigghiamu la figghia di lu Re di Spagna. La sira quannu iju pi pigghiari la pupa, e nun la truvau cchiui, si misi a chianciri, e pistuniàrisi tutta, a tirarisi li capiddi; 'nsumma, a fari un gran tirrimotu. Nta stu mentri veni sò patri, e cci spija: — «Chi hai?» E idda: — «Chi haju ad aviri! ca s'hannu pigghiatu la mè bedda pupa di lu finistruni!». A sta nutizia lu Re duna ordini ca a cui cci porta la pupa cci duna mill'unzi di cumprimentu. 'Un accumpariu nuddu nuddu.