La Figghia di lu Re dispirata si nni fuj di lu palazzu, e si nni va a 'mpijarisi402 pi cammarera nna lu Re di Purtugallu. 'Na jurnata, prujennu lu manciari403 a lu figghiu di lu Re, s'adduna ca ddà dintra cc'era la sò pupa. Puviredda! sangu 'un cci nn'arristau 'nta li vini. E chi fa? grapi la porta pi forza, pigghia la pupa, e scappa comu un surruscu404 e si nni va nni sò patri. Sò patri nun l'arricunuscíu, pirchì era fatta niura di lu fumu, e perciò la fici purtunàra.
      Nna lu jardinu cc'era 'na funtana, ch'era sfunnata d'un latu, e sutta cc'era 'na cammara scura. Ora siccomu tutti li puvireddi javanu nni lu Re a dumannari la limosina, lu Re, siddiatu, dissi a la purtunaredda, ca si idda faceva tràsiri quarchi àutra puviredda, la facia jittari nna la cammara di la funtana sfunnata. Ma idda nu nni 'ntisi nenti di st'amminàzzitu405, e sicutau a lu solitu, e lu Re cumanna ca fussi jittata ddà dintra. E accussì fu fattu.
      Quannu fu ddà dintra, vitti un pirtusu, e si misi a sfunnari 'nsina chi fici un pirtusu granni quantu cci capeva idda; trasíu, e vitti supra un stipu dui palummi cotti, càudi càudi. Li pigghia e si li mancia. Lu 'nnumani nn'attruvau n'àutri dui, e fa lu stissu sirvizzu406. Lu terzu jornu, curiusa di vidiri cui cci mittia ddi palummi, passa nna la cammara appressu, e nun vidi a nuddu; passa nna la terza, e vidi, e chi vidi?407 vidi 'na fimmina bedda quantu lu suli, 'ncatinata, chi cci dici: — «E comu tu ccà? Cui ti cci purtau?» Idda cci cunta, di lu prima sinu all'urtimu, tuttu chiddu chi cci avia passatu408. Allura chidda cci dici: — «Dunca tu si mè soru, pirchì io sugnu la figghia di lu Re di Spagna.