» E chi vulistivu vidiri! s'abbrazzanu, si vasanu e si mettinu a chianciri pi la cuntintizza. Ddoppu finuti, la soru 'ncatinata cci dici: — «Io sugnu 'mmanu a li fati; tu ora vai nni lu Re nostru patri, e cci dici ca si voli libbirari a mia cci vonnu deci matroni cu ciuri e cu 'ncensi, e poi ottu òmini tanti forti chi hannu a manïari 'na mazza di centu cantàra pi scacciari li testi a cui dicu io».
      S'abbrazzàru arreri, si vasàru, e la soru ch'avia statu castigata di lu Re si nni iju nna la sò cammara. Quannu cci purtàru lu manciari, cci dissi a 'na pirsuna, ca vuleva parrari cu lu Re. Lu Re cci accunsintiu, e quannu fôru 'nsèmmula di sulu a sulu, idda cci dissi, ca si cci dava la libbirtati, cci faceva attruvari la figghia chi cci avianu pigghiatu li fati, e l'àutra chi si nn'avia fujutu. A lu Re nun ci parsi veru di sèntiri sta prumissa; e cci rispusi ca nun sulu l'allibbirava, ma chi cci dava tuttu chiddu chi vulia idda. Idda cci turnau a diri ca cci abbisugnavanu ottu matroni cu ciuri e 'ncensi chi facianu oduri, e di cchiù deci òmini di forza maravigghiusa pi 'mpugnari e maniari 'na mazza di centu cantàra; e lu Re subbitu subbitu detti ordini chi si priparassi lu tuttu.
      'Nta mentri si facevanu sti priparativi, lu figghiu di lu Re di Purtugallu, 'ncurrivatu ca cci avianu arrubbatu la pupa, junci a Spagna, e si nni va drittu tiratu a la Curti.
      La Figghia di lu Re, ddoppu chi fu priparatu una di tuttu, fici scinniri li deci matroni e li ottu òmini furzusi nna la cammara sutta la funtana, e fici accussì: li matroni li misi avanti c'un cannistru di ciuri e di 'ncensu ca facevanu 'na musía;409 l'òmini li misi appressu cu la mazza pronta.