Lu sirvituri548 a 'na banna, lu Principi e lu pitturi a 'n'àutra. Comu juncinu a la fini di lu voscu, vidinu un vecchiu ch'azzappava e lu Principi lu saluta:
      — «Ti salutu omu di terra!»
      E lu vecchiu cci rispunni:
      — «Bemminutu, omu di guerra.»
      — «E li dui?549»
      — «Vannu pi li tri»550.
      — «E li longhi?»
      — «Sunnu curti»551.
      — «Cc'è nivi a li muntagni?»
      — «Tempu nn'è»552.
      Si susi lu bon vecchiu e li porta a la casa sua, a lu Principi e lu pitturi553. A la casa cc'era sò figghia chi tissia; trasi lu Principi e cci dici:
      — «O donna, chi tila stenni.»....
      — «O Cavaleri, vidi chi ti penni!554»
      Si vôta lu patri: — «E tò matri?» cci dici a la figghia. — «Iju a fari vìdiri lu munnu a cu' 'un l'ha vistu mai»555.
      — «E tò nanna?»
      — Iju a fari onuri a cui 'un ni pò aviri fattu cchiù.»556.
      — «E tu chi stai facennu?»
      — «Io staju facennu abballari senza sonu»557.
      Si vôta lu patri cu lu Principi: — «Signuri, v'aviti a 'ccummudari558 cu chiddu chi cc'è pi manciari.» 'Nta mentri, veni la nanna e la matri, e accumènzanu a manciari. Mentri manciavanu tutti, lu Principi dici sutta vuci a lu pitturi: — «Si cci parra la panza, sta giuvina è la mugghieri di lu Riuzzu, cà 'un havi nuddu difettu.»
      Dunca la sira si jeru a curcari, e la matri di la picciotta si scurdau a priparàricci a lu Principi li cirina559 pi la notti, si s'arruspigghiava. La notti s'arruspìgghia lu Principi, e java tantiannu560 pi truvari li cirina. Nun truvannu nenti, si susi, e a tantuni a tantuni si 'nfila nna la cammara unn'era curcata la giuvina561.
      Comu 'ncugna, tocca, e cci tocca la panza.