— «'Un mi tuccari, ca sugnu di lu Re.» Si ritira la manu; tocca arreri. — «T'haju dittu: 'un mi tuccari, ca sugnu di lu Re562.»
      Lu Principi torna nni lu pitturi: — «Sapiti? accussì e accussì563: ddà dintra cc'è 'na giuvina ca cci parra la panza.» — «Dunca dumani io cci fazzu lu ritrattu, e poi lu purtamu a lu Re.»
      Lu 'nnumani, comu si sùsinu564, lu pitturi cci fa lu disignu565; lu Principi cci addumanna la billissima licenza566. — «Vi salutu; 'ntra jorna a rrividèricci567 di prisenza.» — «Quannu viniti — cci dici lu vecchiu — nni faciti sempri piaciri.»
      Lu primu paisi chi junceru568, lu pitturi finiu lu ritrattu: lu Principi si l'attaccàu a lu coddu, e turnaru a lu paisi. L'àutri Granni di Curti cu li pitturi569 si jeru arricugghiennu a picca a picca570: e quannu fôru tutti, si teni un Cunsigghiu, e lu Re sutta sògghiu. Lu Riuzzu, a tutti li ritratti ci mittía peccu571: si susi lu Principi Butera: — «Maistà, s'un vi piaci stu ritrattu, mogghi pi vui 'un cci nn'è.» E cci proj572 lu ritrattu chi tineva a lu coddu. — «Chista mi piaci, dici lu Riuzzu; ma ci parra la panza?» — «Maistà sì» — «Dunca chista è mè mogghi.» Si priparanu li granni àbbiti, quattru carrozzi, e dudici dunzelli pi vistilla. Si mettinu tutti 'n carrozza: lu Principi, li dunzelli, e li sirvituri, e partinu pi jiri a pigghiari dda giuvina. Comu lu bon vecchiu vidi sti carrozzi, lu menu chi putia pinsari573 ca vinianu pi sò figghia. Li carrozzi juncinu e 'mpìncinu574; scinni lu Principi, e cci fa rivirenza a dda giuvina cu diri ca lu Riuzzu la vulía pi mugghieri.