T'avvinni quarchi cosa? cc'è quarchi piriculu? Parra!» Lu cumpari cci dici: — «Maistà, semu persi: li pisci stannu niscennu di lu mari; e stannu acchianannu a li muntagni.» — «E com'è pussibbili? cci dici lu Riuzzu. — «E cum'è pussibbili? — cci dici cumpari — ca la jimintedda mia si la havi a tèniri mè cumpari?» Lu Riuzzu sintennu accussì; — «Beni, dici, la jimintedda è tua, la jimenta è tua: scinni 'nta la mè stadda, pìgghiati ddi cavaddi chi tu vôi; ma nun veni di lu tò stomaco sta sputazza590.»
      Lu 'nnumani appena fattu jornu: — «Rigginedda, — cci dici lu Riuzzu, — mentri tu ti 'mmischi 'nta l'affari mei, pìgghiati zoccu vôi, chiddu chi ti pari e piaci 'nta lu palazzu, e ti nni vai.» — «Riuzzu, — cci arrispunni idda — m'aviti a dari un misi di tempu.» — «Quanto vôi.»
      Idda chi fa? manna a chiama tanti manuali: muraturi, mastri d'ascia,591 pitturi, tapizzeri: e cci dici: — «'Ntra termini vintottu jorna vogghiu fabbricatu di tuttu puntu un palazzu, tuttu ddiffirenti di chistu; e lu vogghiu fattu 'n facci unni staju io.» A li vintisetti jorna la sira, lu palazzu fu allistutu592 cu tapizzaríi, divani, e tutti sorti di cummuditati. A li vintinovi jorna, idda chiama lu Riuzzu e cci dici, ca la sira, si tantu l'havi a piaciri, vurría manciari a tavula cu iddu. La sira mentri stavanu manciannu, idda cci proj un bicchirinu di vinu alluppiatu. Iddu vivi, e ddoppu un mumentu abbucca593. Idda lu fa vèstiri di li megghiu àbbiti, e si lu fa acchianari a palazzu novu.
      Lu 'nnumani iddu, comu s'arruspigghiau, firriau l'occhi, e un putia capiri unn'era.