Vui lu canusciti?» — «Gnursì.» — «E allura, Patri-drau, dicitimi, chi statura havi?» — «Quantu la mia.» — «'Nca mentri è chistu, pruvamu, dici Tridicinu fintu monacu, si vui cci capiti 'ntra sta càscia: e si cci capiti vui, cci capi iddu.» — «Oh bona!» dici lu Drau; e trasíu dintra la càscia. Allura Tridicinu chiudi la càscia e cci dici: — «Taliàti bonu, Patri-drau, si cc'è pirtusa.» — «Nun cci nn'è» — «Aspittati videmu si chiudi bona, e si a carricàrila è gravusa.»
      E 'ntra stu mentri Tridicinu chiudi e 'nchiova la càscia, si la carrica, e si metti a curriri pri la citati. Comu lu Drau dici: — «Basta, ora!» Tridicinu si metti cchiù a curriri, e ridennu cci canta pri sfregiu sta canzuna:
      «Eu sugnu Tridicinu,
      Chi ti portu 'ntra lu schinu;
      Ti nn'hê fattu e ti nn'hê fari,
      A lu Re t'hê cunsignari.»
      Junti nni lu Re, lu Re fici 'ncatinari a lu Drau pri li manu e pri li pedi cu 'na catina di ferru, e accussì cci fici rudiri l'ossa pri tutta la sò misira vita. A Tridicinu poi cci detti quantu cchiù ricchizzi e trisori cci potti dari, e lu vosi sempri a la sò spadda comu omu valenti di la prima cima.
      Tridicinu arristau filici e cuntenti,
      E nuàtri ccà chi nni munnamu li denti.
      Borgetto1167.
     
      VARIANTI E RISCONTRI
     
      In una lezione di Bisacquino, Tridicinu andando per rubare la cortina d'oro del Drago s'incontrò in un'aquila, in un leone e in una formica che il fecero arbitro d'una loro questione per ragion di preda. Tridicinu dividendo, li lasciò tutti e tre contenti, ed essi gli fecero dono di un pelo (il leone), d'una penna (l'aquila), e d'un piede (la formica); co' quali doni egli potè riuscire all'impresa, seguìta poi da quella dell'anello rubato al Drago e dalla presenza dello stesso Drago.