— Questa versione è una vera trasformazione della storia di Sansone nel Libro de' Giudici.
      La ricerca d'un'acqua consimile alla nostra, ma senza inganno in chi la commette e desidera, è in GONZENBACH, n. 64. Nella 80 una vecchia regina si fa consigliare dal medico il sangue del drago perchè ella possa guarire. Nella 67 è la circostanza del giovane stato ucciso e legato a un cavallo fatato, che poi lo porta a un palazzo di fate ove è tornato in vita.
      LXXII.
     
      La figghia di lu mircanti di Palermu.
      'Na vota s'arriccunta ca cc'era 'n Palermu un mircanti. Stu mircanti avia 'na sula figghìa; e di sta figghia nn'era troppu gilusu. 'Na jurnata a stu mircanti cci vinni 'na 'mmasciata ca lu vulía lu Re a Napuli. Mischinu, si misi 'nta 'na gran cunfusioni; dici: — «E comu la lassu a mè figghia?!» Iddu va a la casa, e cci cunta la cosa a sò figghia; dici la figghia: — «Papà, chi havi ca è accussì siddiatu?» — «E ch'hê d'aviri, figghia mia! mi mannò a chiamari lu Re, e mi voli a Napuli.» — «Ih! dici idda, e pi chissu s'havi a siddiari? Vassía mi fa 'nchiuvari finestri, finistruna, porti, tutti l'apirturi chi cci su' 'nta lu palazzu; mi fa 'na pruvista, e ch' 'un mi fa mancari l'acqua, e lu Signuri lu pozza accumpagnari.» Dici: — «Sì, figghia mia; ora vaju nni lu mastru d'acqua.» Cci fici tutti li pruvisti; la 'nchiuiju; partíu. Li mastri d'acqua si sapi(347): a li du' jorna lu mastru cci fici mancari l'acqua. Cunfusa, sta picciotta si misi a firriari lu palazzu, e 'un truvava a nuddu. Comu java firriannu, vitti 'nta 'na càmmara un purteddu, d'unni si scinnía 'nt'ôn puzzu.