Tu t'arresti cu la cammarera; quannu poi io sugnu situatu, allura ti mannu a pigghiu e ti nni veni nna la Spagna.» Figuràmunni lu chiantu. All'urtimu, cci dici lu frati: — «Ora senti ch'âmu a fari: nni facemu fari lu ritrattu, io mi pigghiu lu tuo, e tu ti pigghi lu mio;» e accussì ficiru. Partíu lu frati, e chista arristau sula nna lu palazzu, e 'na cammarera cu idda. Dinari ca 'un cci nn'ammancavanu, gioj, petri priziusi; e stava accussì.
      Don Giuseppi arrivau nni lu Re di Spagna. Re di Spagna l'acclamau, e lu misi a scriviri(394); ed era cuntintuni ch'avia stu giuvini pi Sigritariu sò. Re di Spagna cuminzò a cògghiri tant'affizioni a stu giuvini, ca 'nta ogni cosa di lu Regnu cci dicía: — «Don Giuseppi, facìti vui... 'Un cci siti vui?... Io mi fidu; e zoccu faciti vui ben fattu sia!» 'Nca tutti li primàrii di la Curti, li Bracceri, lu Sigritariu passatu, li Cavaleri, a vìdiri sti cosi cci nni vinni 'na gran gilusia, e circavanu lu modu e la manera, circavanu 'na calunnia(395) pi accusallu. Stu picciottu si cartiggiava cu sò soru; un jornu a Don Giuseppi cci vinni lu spinnu(396) di sò soru, nesci lu ritrattu di sò soru e lu metti a taliari; talía talía, e cci scappava quarchi lagrima. Ora unu di chisti, lu Bracceri, vidi sta scena, 'un appi cchiù chi vìdiri(397), va nni lu Re: — «Bravu, Maistà! E chistu è lu bonu!... E chistu è Don Giuseppi, chi vostra Maistà cunta e stanca di li buntati chi havi! Chistu cu' sa cu cu' si la senti, e vui nni nisciti foddi!...(398)» — «E chi havi?