Ora sta vecchia appi tanta abbilità ca di càmmara 'n càmmara si iju a 'nfilari quarchi quattru o cincu càmmari 'nnintra; e si ucchïau unni si curcava la patruna(409). La notti, la signura stranuttata di stu malutempu, pigghiò sonnu. Tutti si jeru a 'rrisittari; comu la vecchia vidi ca tutti durmìanu, trasi nni la càmmara di la signura; cci sulleva la robba di lu lettu, e la metti a taliari di la testa sina a li pedi. Va pi vìdiri, e vidi ca supra la spadda dritta cci avia tri pila comu si fussiru tri fila d'oru; vitti 'na furficìcchia; cci tagghia sti tri pila d'oru, si l'attacca 'nta 'na punta di fazzulettu, adàciu adàciu la cummogghia e si nni va a lu sò postu unn'idda era. Arrivannu ddà misi a rancuràrisi arreri, a sbattiri li denti dicennu: «Ba-ba-ba-ba! Vih! e comu si cci stà ccà! Grapìtimi, quantu mi nni vaju, ca m'ammanca lu rispiru!» Dda povira signura s'arruspigghiau; senti stu rancùru, e duna ordini la cammarera chi facissi nèsciri a sta vecchia. Comu la vecchia fu fora, trova lu Bracceri chi tissia lu chianu di lu palazzu. Cci duna li tri pila; iddu ca 'nta li robbi 'un cci capía, cci duna un gran cumprimentu: manu e pedi nun appi(410); a lu 'nnumani si 'mmarca pi jirisìnni a Spagna. Arrivannu a Spagna si prisenta a lu Re: — «Maistà, e chistu è lu signali di la soru di Don Giuseppi!» Lu Re arristò alluccutu, e si chiama a Don Giuseppi: — «Don Giuseppi, la scummissa l'aviti persu: chistu è lu signali di vostra soru: tri pila d'oru ch'idda havi supra la spadda dritta.