Di sti dinari metti a 'ccattari li megghiu gioj; pigghia un bonu orifici, e cci dici: — «Facitimi 'na bella stivala, e supra la stivala cci aviti a 'ngastari tutti li me' gioj.» Poi si fa fari un àbbitu tuttu di luttu: si 'mmarca e va a Spagna. Lu tempu passa; passàru li du' misi. Junci a Spagna, e senti trummi, e chi vidi? vidi li surdati chi purtavanu un omu abbinnatu ca java a morti. Vistuta di ddu grann'àbbitu nìuru, cu un pedi cu la sula quasetta e l'àutru pedi cu la stivala 'nfilata, ca era 'na maravigghia a vidilla. Curri, si jetta 'mmenzu la fudda gridannu: — «Grazia, Maistà! Maistà, grazia!» Tutti li genti vidennu a sta signura, cci facíanu tutti largu. Lu senti lu Re: — «Firmati! dici a li surdati; — Chi cc'è?» — «Grazia, Maistà e Giustizia! Grazia Maistà e Giustizia!» Lu Re a vìdiri sta biddizza, dici: — «Ti sia cuncessa!» — «Maistà, lu vostru Bracceri ddoppu d'avìrisi gudutu la mè pirsuna, m'ha arrubbatu la stivala paràggia di chista!» E cci ha mustratu dda stivala china di damanti e petri priziusi. Lu Re comu vidi dda stivala, allucchíu: si vôta cu lu Bracceri: — «E hai fattu chista! Ddoppu d'avìriti gudutu a sta giuvina, cci hai arrubbatu la stivala!... E nun t'affrunti di cumpariri a la mè prisenza!..» Lu Bracceri fici la morti ch'appi a fari: — «Maistà, dici, io nun la conusciu a sta signura!» — «Comu! dici la picciotta, nun mi canusciti?... E allura comu aviti dittu ca avìstivu chi fari cu mia?!» — «Maistà, dici lu Bracceri, ca mancu sapia cchiù parrari; cuntu la cosa comu va.