Per altri riscontri inglesi, francesi, tedeschi, e orientali vedi la 8. delle Vergleichende Anmerkungen di R. KÖHLER nelle Sic. Märchen.
      LXXIX.
     
      Lu Re di Napuli.
      S'arriccunta e s'arriccunta stu billissimu cuntu davanti a lor Signuri.
      'Na vota cc'era un Re uorvu di tutti du' uocchi; iju un Dutturi pi dàricci ajutu e cci dissi: — «Vui aviti dui figli; quannu vi vonnu beni sti du' figli, v'hannu a pricurari 'na pinna di hu(452).» Lu patri chiamò a sti figli: — «Figli mei, mi vuliti beni vuàtri?» — «'Nca papà, nuàtri lu vulemu beni quantu l'uocchi nostri.» — «'Nca vuàtri m'âti a pricurari pi la mà saluti 'na pinna di hu. Cu' di vuàtri mi la pricura, cci dugnu lu regnu.» — «Patruni, papà: nuàtri pi la sò saluti nni jamu a sdirrubbari.»
      Si partieru sti figli: dui eranu cchiù ranni, e unu era cchiù nicu. Lu nicu nun lu vulievanu fari vèniri; ma poi furzati fuôru, e si lu purtaru. Comu si lu purtaru, cci scurau 'nta un vuoscu. La sira si curcaru 'n capu un arvulu, unu a 'na punta, e unu a 'n'àutra, e lu picciriddu 'nsemi cu lu minzanu. Dui s' addrummiscèru; ma lu picciriddu 'un s'addrummiscì'. Circa a menzannotti, 'ntisi cantari stu hu; cci sparà' e lu pigliau; e cci trâu li pinni e si li sarvau. La matina comu agghiurnau, li frati 'ntisiru ca lu fratuzzu avía pigliatu la pinna di lu gu; e nn'àppiru 'na forza di mmìdia, ca iddu s'avía a pigliari lu premiu di lu patri. Hannu pigliatu, e hannu ammazzatu lu picciriddu e si pigliaru li pinni.
      Arrivaru nni sò patri e cci dettiru la pinna di hu; lu Re si passà' dda pinna di hu 'nta l'uocchi, e cci vinni la vista.